Coronavirus: Police don arrest 39 pipo them wey break the order wey government talk

Despite the strict instruction wey government give for country, say make pipo them no dey plenty gather take go outside. Some pipo for Lagos still go open club for night say make pipo them enter come flex.

The Lagos police command come talk say them arrest about 620 pipo wey no gree listen to the instruction wey government give. Among this number wey i mention say them arrest, 39 pipo wey dey among, na from strip club them from take catch them.


The President Muhammadu Buhari come out for television on March 30. Him talk say make everybody dey dey their house so that them go fit fight the virus wey dey disturb. Him mention Lagos state, Ogun state and Federal Capital territory as the state wey them pipo suppose dey dey house on till area go dey ok for 2 weeks. Pipo them don obey the instruction for the first 2weeks wey government give, as area never dey ok so that pipo them go go back to their normal thing, him come add another 2weeks join.

On 21/4/2020, around that kind 10pm for night, them arrest about 95 pipo wey dey travel from one state to another. Them catch this pipo them for Bhojson area wey dey inside Ebute Metta and them carry like 7 buses wey them they use. The number wey dey the body of the motor na LG91BGT, Lagos to Benue BDA690XA, Lagos to Abuja BGA86EA, Lagos to Abuja LSD459XA, Lagos to Benue; LRN 105 YR, Lagos to Ilorin; LSD 81 XX, Lagos to Ilorin and BWR 975 PN.

Two days later,  around 10:30pm again, Police wey dey Maroko area them arrest 10 pipo wey do party for Lekki Garden. As them arrest them finish, them take them go court, Court say them dey guilty say them go dey 6 monnths for inside jail join do community services before them go release them say make them go back their house.

On 24/4/2020, around that kind 10:30pm, Rapid Response Squad them arrest one Suleiman Abubakar wey be the Imam of on Sheik Central Mosque for holding prayers for mosque despite say government do talk say make no mosque or church open for now until area don dey ok, that same day for afternoon, them arrest 39 pipo them for inside one hotel wey dey for Idimu for striptease and clubbing.

The Lagos police commissioner don tell pipo wey dey live for inside the state, say make pipo them continue to dey obey wetin government say make them do especially for this kind period wey we all get the same enemy wey our eye no fit see so that them no go get wahala with government and police. Him say make pipo them also comot their hand from spreading fake fake news up and down as fake news them no dey help anybody instead e dey add more pepper and salt to the one wey don dey ground already.