How we go take help person wey chop poison inside food

First aid na the first thing wey person wey reach where pipo wound for body go first do so that the injured person no go die, so the person wey get wound for body go recover wella, him mind go dey at rest say him dey safe and the wound no go come big pass as e be before.


Food poisoning na sickness wey person chop from food wey him eat wey yamayama (dirty) them plenty for inside the food. This sickness go make the person to dey vomit, dey go toilet too much, e go dey get plenty pain for inside him tommy. Food poisoning no dey stay long for inside the person body.  The pain go stop but if you notice say the pain no stop after the second day wey him start, e better make you run go see doctor or hospital for melicine.

Food poisoning fit make you dey vex like say tomorrow no dey especially when e be say the pain too much wey you no fit sit down, stand or do any other thing them. As the pain plenty like that, you no go just dey alright at all. 

Different pipo them body get as e dey take react, when them chop food wey no make sense for them body. If you look down, you go see the plenty list of how different pipo them body dey take react when them don chop food wey no dey alright for them body. 

Some of thing them na:

• Too much Pain for belle, 
• You go dey vomit, 
• Your body go dey hot too much,
• Your nose go dey run,  
• Your head go dey hammer you, 
• Too much pain for joint, 
• Blood for your shit when you dey go toilet. 
• Water no go dey your body.

Way way them dey take check your body to know whether you don chop wetin no make sense for your body

If that thing wey dey make you sick no stop after 2 days, you need no waste time at all to go see doctor for clinic make doctor check you. The doctor go take him time take check your body for am to know wetin dey wrong with you so him go fit give you proper melicine. The doctor fit ask you question about wetin you chop put for body, when you chop am and which time the sickness take start? All na make him know as him go take start to dey treat you.

In other for am to carry out the test for your body,

Blood test For this level, the doctor go say make them draw blood for your body go run test on am so that them go dey certain. The reason why him won draw the blood na if him feel say the yamayama wey dey the food wey you eat, wey dey make you sick, don waka join enter your blood. Make you know say, when them don draw the blood, do the test finish, them go fit tell you the result and do wetin them suppose do so that you go dey ok

Imagining test For here, them go do you MRI and CT scan. This one go help them check and clear out other things wey them dey suspect say be the problem before them proceed.

Stool cultures,For here, them go say make you shit small inside container come give them. Them go carry am go where them dey do test on am so that them go fit tell wetin dey wrong with your body and them go even fit identity the yamayam wey dey cause am for your body.

Treatment wey them go use stop food poisoning for your body

When you see say the problem wey the yamayama wey dey inside the food wey you chop dey cause for your body too much, and doctor them don check you body finish, them fit give you

• Antibiotics. The doctor go tell you how you go take take the melicine and you must follow am exactly as them take tell you, if not, na more problem for your body.
• Replacement of lost fluids.
  Them go replace all the water wey you don loose fo body due to the sickness. Before them go do am, them go don dey sure say you know well through the result of the test wey them do for your body and them go know from your answer wey you give them say you dey shit too much and you dey vomit too much.

E dey very important make you know say, the major thing wey dey behind helping person wey no well base on the topic wey we dey discuss for here, na to make the person to:

• Rest - this one go make him body to recover on him own.
• Eat - if the person don vomit finish, make him wash him mouth and try to eat another food.
• Re hydrate - this one na to take liquid wey go give am water for body as him don loose plenty water for shit and vomit.
• Dial 999: Na to call this number if the person no come dey respond again.